Lumagda sa isang Joint Memorandum Order (JMO) ang Authority of the Freeport Area of Bataan (AFAB) at Philippine Retirement Authority (PRA) upang mapadali ang pagkuha ng Special Resident Retiree’s Visa (SRRV) sa Freeport Area of Bataan (FAB). Pinangunahan nina AFAB Administrator at CEO Hussein Pangandaman at PRA General Manager at CEO Roberto Z. Zozobrado ang seremonya ng paglagda.

Ginanap ang pirmahan sa Camaya Coast, isa sa mga rehistradong negosyo sa FAB, na kilala sa malinis na dalampasigan at luntiang tanawin. Ayon sa AFAB, layunin nitong hikayatin ang mga dayuhang retirees na mamuhunan at manirahan sa FAB, na may potensyal sa mga investment na may kaugnayan sa turismo.

Dumalo rin sa seremonya sina AFAB Deputy Administrator for Operations Michael Angelo G. Paderanga at PRA Department Manager Antonio Rivera. Inaasahan na mas maraming dayuhang retirees ang mahihikayat sa kasunduang ito, na magpapalakas sa ekonomiya ng Freeport sa pamamagitan ng pagdaragdag ng pamumuhunan.

Sa pagpapalawak ng residency options at pagbibigay ng insentibo sa negosyo, patuloy na pinatitibay ng AFAB at PRA ang FAB bilang isang lumalawak na sentro para sa dayuhang pamumuhunan.

The post AFAB at PRA, lumagda sa JMO para sa Special Resident Retirees’ Visa sa FAB appeared first on 1Bataan.